US don record 500,000 Covid-19 deaths - Imagine wetin e look like

President Joe Biden don address di nation as di US mark 500,000 deaths from Covid-19, di highest toll of any kontri for di world.

"As a nation, we no fit accept such terrible fate. We need to resist becoming unfeeling to di sorrow," e tok.

Di president and vice-president, and dia spouses, also observe a moment of silence outside di White House during one candle-lighting ceremony.

More dan 28.1 million Americans don dey infected - anoda global record.

US don see more dan twice as many deaths as di next hardest-hit kontri, Brazil.

But na also one kontri wey get di most population.

In terms of deaths per 100,000 population, e dey rank ninth, behind kontries like di UK, Czech Republic, Italy and Portugal, according to Johns Hopkins University

Di first known US death from di virus come on 6 February 2020.

E mean say half a million lives don go in just over one year, more dan di US death tolls from World War I, World War II and di Vietnam War combined